දියණියගේ විවාහ මංගල්‍ය දින දෑවැද්දටදීමට රැගෙන ආ කුකුළකු නිසා මනමාලයා දැඩි අපහසුවකට පත්වූ පුවතක් දෙල්තොට ප්‍රදේශයෙන් වාර්තා විය.
දෙල්තොට ගොවි මහතෙකුගේ වැඩිමහල් දියණිය පුස්සැල්ලාව ප්‍රදේශයේ තරුණයෙකුට විවාහ කරදීමේ මංගල උත්සවය පසුගිය 29 වැනිදා නෑ හිතමිතුරන් රැසකගේ සහභාගීත්වයෙන් උත්සව ශාලාවක පැවැත්විණි.
මනමාලියගේ ඥාති පිරිස ඇයට දෑවැද්දට ලබාදීමට සූදානම් කරන ලද සියලු දෑ උත්සව ශාලාවේ එක පසක තබන ලද්දේ මහත් ආඩම්බරයෙනි.
විවාහ මංගල්‍යයේ පෝරුව චාරිත්‍ර අවසන්ව නෑ හිත මිතුරන් ආගිය තොරතුරු කතාබහ කරමින් සිටින අතරතුර උත්සව ශාලාව පසුපස සිට කුකුළෙකු ඉගිලගෙන විත් උත්සවශාලාවේ ඉදිරිපස මේසයක් මත වැසුවේය.
මේසයේ වැසූ කුකුළා “කුක්කු කූක්” යනුවෙන් හඬලෑම නිසා උත්සව ශාලාවේ සිටි සියලු දෙනා ආමන්දානන්දයට පත්ව මනමාලයා කුකුළා කියා හඬනැගීම නිසා මනමාල මහතා දැඩි අපහසුවට පත්විය.
සිදුවූ දේ පිළිබඳ සියලු දෙනාගෙන්ම සමාව ඉල්ලූ මනමාලියගේ පියා තම නිවසේ ඇති කළ කුකුලා සහ බිත්තර දාන කිකිළියත් පෙට්ටියකදා දුවට දෑවැද්දටදී තිබූ දෑවැදි බඩු ළඟ තබා තිබියදී කුකුළා පෙට්ටිය සිදුරුකරගෙන එළියට ආ වග සඳහන් කළේය.
කුකුළාත් කිකිළියත් දියණියට දුන්නේ අපේ රටේ දරුවන් මන්දපෝෂණයට ලක්වී ඇති බව ප්‍රවෘත්තිවල නිතර කියන නිසා බවත් දියණිය වගේම දියණියට ඉදිරියේදී ඉපදෙන්නට ඉන්න දරුවන්ද මන්දපෝෂණයෙන් බේරාගැනීමට සිතා කුකුළන් දෙදෙනා දියණියට තෑගි දුන් බවත් මනාලියගේ පියා මංගල සභාව අමතා පැවසුවේ සිදුවීම් සම්බන්ධයෙන් යළිත් වතාවක් සමාව ඉල්ලමිනි.
0 Comments