චැම්පියන්ස් කුසලාන ක්‍රිකට් තරගාවලියේ අද (23) පැවැත්වෙන ඉන්දු – පාකිස්තාන තරගයේදී ඉන්දීය වේගපන්දු යවන ක්‍රීඩක මොහොමඩ් ෂාමිට අමිහිරි අත්දැකීමකට මුහුණදීමට සිදු විය.
තරගයේ පළමුවෙන් පන්දුවට පහරදුන් පාකිස්තානයට එරෙහිව පන්දු යැවීම ආරම්භ කළ ෂාමි, පළමු පන්දුවාරය පන්දු 11ක් යොමුකරමින් අවසන් කළ අතර මෙය චැම්පියන්ස් කුසලාන ඉතිහාසයේ දෙවන දිගම පන්දුවාරය ලෙසින් සැලකෙයි.
මෙහි පෙරමුණේ පසුවන්නේ බංග්ලාදේශ පන්දු යවන්නෙකු වන හසිබුල් හොසේන් සහ සිම්බාබ්වේහි ටිනාෂේ පන්යන්ගරාටය.ඔවුන් දෙදෙනාම පන්දු 13ක පන්දුවාරයක් යවා තිබේ.
එමෙන්ම ෂාමි අද යැවූ මෙම පන්දුවාරය ඉන්දියානුවෙකු චැම්පියන්ස් කුසලාන ඉතිහාසයේ යැවූ දිගම පන්දුවාරයද වෙයි.
ෂාමිගේ මෙම පන්දු යැවීමත් සමග ඔහු පන්දුවාරයක් අවසන්කිරිම සඳහා වැඩිම පන්දු සංඛ්‍යාවක් යැවූ ඉන්දියානු පන්දු යවන්නන් අතරද සම පළමු ස්ථානයට පත්විය. සහීර් ඛාන් සහ ඉර්ෆාන් පතාන්, ෂාමිට පෙර මෙම අමිහිරි වාර්තාවට හිමිකම් කියූ පන්දු යවන්නන් වේ.
2004 ආසියානු කුසලානයේදී පාකිස්තානයේ මොහොමඩ් සාමි පන්දු 17ක් යැවීම ලොව දීර්ඝම පන්දුවාරය ලෙස සැලකෙන අතර එම පන්දුවාරයට වයිඩ් 7ක් හා නිපන්දු 4ක් ඇතුළත් විය.
0 Comments