1983 සිට 2009 දක්වා කාලය තුළ ශ්‍රී ලංකාවේ සන්නද්ධ ගැටුම්වලදී මානව හිමිකම් උල්ලංඝනය කිරීම සම්බන්ධයෙන් වගකිව යුතු ශ්‍රී ලංකා රාජ්‍ය නිලධාරීන් හතර දෙනෙකුට එරෙහිව විශේෂ ආර්ථික පියවර පනතේ රෙගුලාසි අනුව ඉලක්කගත සම්බාධක පනවන බව කැනඩාවේ විදේශ කටයුතු අමාත්‍ය මෙලනි ජොලි අද(10) නිවේදනය කරයි.
ඒ අනුව හිටපු ජනාධිපති මහින්ද රාජපක්ෂ, හිටපු ජනාධිපති ගෝඨාභය රාජපක්ෂ, හිටපු හමුදා නිලධාරියෙකු වූ සුනිල් රත්නායක හා හිටපු ලූතිනන් කමාන්ඩර් චන්දන ප්‍රසාද් හෙට්ටිආරච්චි හට මෙම සම්බාධක පැනවෙනු ඇත.
අදාළ නිවේදනය මගින් කැනඩාවේ විදේශ කටයුතු අමාත්‍ය මෙලනි ජොලි පවසන්නේ ශ්‍රී ලංකාවේ මානව හිමිකම් උල්ලංඝණය කිරීම් සිදු කළ පුද්ගලයන්ට අඛණ්ඩව දණ්ඩමුක්තිය ලබා දීම කැනඩාව පිළි නොගන්නා බවයි.
විශේෂ ආර්ථික පියවර පනතේ රෙගුලාසිවලට අනුකූලව මෙම ලැයිස්තුගත පුද්ගලයින්ට කැනඩාව සමඟ ගනුදෙනු කිරීමේ තහනමක් පැනවෙනු ඇත.
එමඟින් කැනඩාවේ ඔවුන් සතුව තිබිය හැකි ඕනෑම වත්කමක් සංක්‍රමණ සහ සරණාගතයින් ආරක්ෂණ පනත යටතේ කැනඩාව විසින් පිළිනොගන්නා බවද නිවේදනයේ සදහන් වේ.
වගවීම ආමන්ත්‍රණය කරන ලෙස කැනඩාව සහ ජාත්‍යන්තර ප්‍රජාව දිගින් දිගටම ඉල්ලා සිටියද, ශ්‍රී ලංකා රජය සිය මානව හිමිකම් ආරක්ෂා කිරීම සඳහා සීමිත සහ සංයුක්ත ක්‍රියාමාර්ග පමණක් ගෙන ඇති බව කැනඩාවේ විදේශ කටයුතු අමාත්‍යවරිය පෙන්වා දෙයි.
මෙමගින් බලපෑමට ලක් වූ පුද්ගයින් සඳහා යුක්තිය පිළිබඳ හා සාමය සහ ප්‍රතිසන්ධානය සඳහා වූ අපේක්ෂාවන් අනතුරේ හෙළා ඇති බවයි ඇය පවසයි.
මානව හිමිකම් උල්ලංඝණය කිරීම්වල වින්දිතයින්ට සහ දිවි ගලවා ගත් අයට යුක්තිය ඉටු විය යුතු බවත් අර්ථවත් වගවීමේ ක්‍රියාවලියක් ස්ථාපිත කිරීම සඳහා වන කැපවීම ඉටු කරන ලෙස කැනඩාව දිගින් දිගටම ශ්‍රී ලංකාවෙන් ඉල්ලා සිටින බව නිවේදනයේ වැඩිදුරටත් සදහන් වේ.
0 Comments