අන්තිම මොහොතේ ගහපු අන්තිම තුරුම්පුවත් ආපිට කැරකෙයි!

 

මැතිවරණ වියදම් නියාමනය කිරීමේ පනත් කෙටුම්පත අද (19) දින පාර්ලිමේන්තුවේ දී  විවාද කිරීමෙන් අනතුරුව  සංශෝධන සහිතව සම්මත කර ගැනුණි.

මෙම පනත් කෙටුම්පත තෙවන වර කියවීමේ අවස්ථාව සඳහා ඡන්දයක් ඉල්ලා සිටි අතර ඒ අනුව පැවැති ඡන්ද විමසීමේදී ඊට පක්ෂව ඡන්ද 97ක් සහ විරුද්ධව ඡන්ද 36ක් හිමිවිය.

කෙසේවෙතත් මැතිවරණ කොමිසම සහ අධිකරණ අමාත්‍ය විජයදාස රාජපක්ෂ මහතා එක්ව අවසන් මොහොතේ ඊට එක්කර ඇති සංශෝධනයක් මගින් මැතිවරණය කල් දැමීමේ අවස්ථාවක් මතු නොවන බව දැනගන්නට තිබේ.

එම වගන්තියට අනුව නාමයෝජනා ලබා දී දින 5ක් ඇතුළත අදාළ අපේක්ෂකයන් විසින් සිය වියදම් ප්‍රකාශයට පත් කළ යුතුව ඇති බව වාර්තා වේ.

ඒ කාලය ඇතුළත ඊට අදාළ රෙගුලාසි සකස් කිරීමට මැතිවරණ ‌කොමිසම පියවර ගැනීමට නියමිතය.

ඒ අනුව මෙවර පළාත් පාලන මැතිවරණය කල් දැමීම සදහා මෙම පනත උපයෝගී කරගත නොහැකි බව පාර්ලිමේන්තු ආරංචි මාර්ග සදහන් කරයි.