සනත් නිශාන්තගේ අවසන් කටයුතු ඉරිදා...

අභාවප්‍රාප්ත රාජ්‍ය අමාත්‍ය සනත් නිශාන්ත මහතාගේ දේහය පිළිබඳ අවසන් කටයුතු ලබන 28 වන ඉරිදා සිදුකිරීමට සැලසුම් කර තිබේ.

පාර්ලිමේන්තු මන්ත්‍රී මහින්දානන්ද අලුත්ගමගේ මහතා පැවසුවේ, ආරච්චිකට්ටුව ප්‍රදේශයේ දී අවසන් කටයුතු සිදුකිරීමට සැලසුම්කර ඇති බවය.

සනත් නිශාන්ත මහතාගේ දේහය මහජන ගෞරවය සඳහා අද පස්වරු 5.30 බොරැල්ලේ ජයරත්න මල්ශාලාවට රැගෙන එන අතර දේහය හෙට (26) පෙරවරු 10.30ට පුත්තලමේ පිහිටි ඒ මහතාගේ නිවස වෙත රැගෙන යනු ඇත.

අද (25) අලුයම කටුනායක අධිවේගී මාර්ගයේ සිදුවු රිය අනතුරකින් රාජ්‍ය අමාත්‍ය සනත් නිශාන්ත මහතා සහ ඔහුගේ ආරක්ෂක නිලධාරියා ජීවිතක්ෂයට පත් වුණි.

අද අලුයම දෙකට පමණ රාජ්‍ය අමාත්‍යවරයා ගමන් ගත් සුඛෝපභෝගී රථය එම දෙසටම ඉදිරියෙන් ධාවනය වූ කන්ටේනර් රථයක හා මාර්ගයේ ආරක්ෂිත වැටේ ගැටීමෙන් අනතුර සිදුව තිබිණි.

අනතුරෙන් තුවාල ලැබු ජිප් රථයේ ගමන්ගත් රාජ්‍ය අමාත්‍ය සනත් නිශාන්ත මහතා ඔහුගේ ආරක්ෂක නිලධාරියා මියගිය අතර ජීප් රථයේ රියදුරු රාගම රෝහලේ ප්‍රතිකාර ලබයි.

සනත් නිශාන්ත මහතා මියයන විට 48 හැවිරිදි වියේ පසු වුණි.

මරණය සම්බන්ධයෙන් මහෙස්ත්‍රාත් පරීක්ෂණය අද පෙරවරුවේ රාගම රෝහලේ දී සිදුකෙරුණු බව "අද දෙරණ" වාර්තාකරු පැවසුවේය.

රාජ්‍ය අමාත්‍ය සනත් නිශාන්ත මහතාගේ අභාවය සැලවීමත් සමග ශ්‍රී ලංකා පොදුජන පෙරමුණේ මැතිඇමතිවරුන් ඇතුළු සමීපතමයින් රැසක් රාගම රෝහල වෙත පැමිණ තිබිණි.

තවත් පුවත් :